political crisis in Burundi

Burundi:Col Jean Bikomagu Wigeze kuba Umugaba w’Ingabo Yagandaguwe

Colonel Jean Bikomagu, wigeze kuba umugaba w’ingabo z’u Burundi mu gihe cy’intambara i Burundi (1993-2006)yiciwe i Bujumbura n’abantu batazwi ubwo yatahaga iwe mu rugo muri Quartier ya Kabondo Sud nk’uko uwo mu muryango we yabitangarije AFP.

Abamuteye barashe ku modoka ye agiye kwinjira mu gipangu cye. Umukobwa we nawe bamukomerekeje. Abamuteye bahise batoroka baburirwa irengero.

Willy Nyamitwe, Umuvugizi wa Leta y’u Burundi akaba n’Umujyanama wa Perezida Pierre Nkurunziza yemeje amakuru y’urupfu rwa Col Bikomagu.

Nyamitwe yavuze ko ubu bwicanyi bwiyongereye ku bundi buherutse kuba kandi ko bubabaje.

Bikomagu yari asigaye ari mu kiruhuko , ubu akaba yakoraga muri Interbank aho yari umuyobozi ushinzwe abakozi.

Urupfu rwa Bikomagu ruje icyumweru kirenga nyuma y’urupfu rwa Gen Adolph Nshimirimana wigeze gushingwa iperereza mu Burundi akaba yari n’umujyanama wa Perezida w’u Burundi. Urupfu rwa Bikomagu kandi ruje nyuma y’uko Pierre-Claver Mbonimpa, wagiye unenga leta y’u Burundi ku kutubahiriza uburenganzira bw’ikiremwamuntu, na we arusimbutse ubu akaba arimo kwivuriza mu Bubirigi.

Burundi: Umunyamakuru Esdras Ndikumana Yakubiswe n’Abashinzwe Umutekano

by www.igihe.info

Esdras Ndikumana Photo via Twitter

Umunyamakuru Esdras Ndikumana ukorera Radio Mpuzamahanga y’Abafaransa RFI na AFP, yafashwe n’Abashinzwe umutekano ubwo yari aho Gen Adolph Nshimirimana yarasiwe, arimo afotora anashaka kumenya iby’urupfu rwa Gen Adolph Nshimirimana. Baramujyanye baramukubita bamugirira ibya mfura mbi, bamuhata ibibazo banamwita umunyamakuru w’umwanzi. Bamumaranye amasaha abiri nyuma baramurekura ubu ari mu bitaro ariko ubuzima bwe ntiburi mu mazi abiri nk’uko bitangazwa na RFI. Umuyobozi wa RFI yavuze ko bababajwe n’ihohoterwa ry’uyu munyamakuru ndetse n’ihohoterwa ry’itangazamakuru mu Burundi muri rusange. Bakaba barimo gusaba ibisobanuro Leta y’u Burundi.

Esdras Ndikumana ni umunyamakuru ukorera i Bujumbura akaba ari correspondant wa RFI na AFP mu Burundi.

Ese haba hari icyo Leta y’u Burundi yaba ishaka guhisha ku rupfu rwa Gen Adolph Nshimirimana ku buryo ihohotera umunyamakuru ushaka kumenya ukuri ku byabaye?

Burundi:Gen Adolphe Nshimirimana Yishwe

Gen Adolphe Nhimirima

Gen. Adolphe Nshimirimana wahoze ayobora urwego rw’ iperereza yaguye mu gico yatezwe n’abantu bataramenyekana ari i Kamenge.

Willy Nyamitwe, umuvugizi wa Leta y’u Burundi yemeje aya makuru abinyujije kuri Twitter avuga ko atakaje umuvandimwe na mugenzi we ku rugamba.

General Adolphe Nshimirimana yari asigaye ashinzwe umutekano bwite wa Perezida Nkurunziza, yicanwe n’ abamurindaga batatu.

Ababibonye bavuze ko Nshimirimana yasatiriwe n’ abantu bane bambaye gisirikare, bamisha amasasu ku modoka ye bahita bagenda mu modoka yabo.

Uru rupfu rwa Gen. Adolphe Nshimirimana rubaye nyuma y’iminsi mike Perezida Pierre Nkurunziza atangajwe ko ariwe wegukanye amatora y’Umukuru w’Igihugu, abatavuga rumwe n’ubutegetsi bwe bavuga ko ari iya gatatu kandi inyuranyije n’amategeko.
Kwiyamamaza kwa Perezida Nkurunziza kwatumye abantu bagera ku 100 kugeza ubu bamaze kugwa mu myigaragambyo yatangiye muri Mata uyu mwaka, ndetse yanatumye hacurwa umugambi wo kumuhirika ku butegetsi n’ubwo waje kuburizwamo muri Gicurasi.

Imodoka Gen Adolphe Nshimirima yari arimo

Gen.Nshimirimana yari umwe mu bagize uruhare rukomeye mu kuburizamo umugambi wo guhirika ubutegetsi bwa Nkurunziza, akaba kandi yari akuriye abashinzwe guhangana n’abageragezaga kwigaragambya bamagana ubutegetsi bwa Perezida Nkurunziza.

Amatora mu Burundi: ONU ivuga ko yabaye mu mutuzo

by www.igihe.info

Perezida Nkurunziza ku murongo agiye gutora

Mu itangazo ryashyizwe ku rubuga rw’Umuryango w’Abibumbye kuri uyu wa 23 Nyakanga, Umunyamabanga mukuru w’uyu muryango; Ban Ki-Moon yatangaje ko amatora y’umukuru w’igihugu yabaye kuri uyu wa 21 Nyakanga i Burundi yakozwe mu mutuzo n’amahoro.

Ban Ki-moon yasabye amashyaka atavuga rumwe na Leta i Burundi guhosha imidugararo ikomeje kubera muri iki gihugu abahamagarira gukomeza kugirana ibiganiro bigamije amahoro.

Komisiyo y’amatora mu Burundi ivuga ko amatora yitabiriwe ku kigero kirenga 70%, ibyavuye mu matora by’agateganyo ngo biratangazwa kuri uyu wa gatanu.

Ban Ki-moon yasabye amashyaka yose akorera i Burundi gushyira imbere inyungu z’abaturage nk’uko byavuye mu myanzuro y’inama yahuje abakuru b’ibihugu bya Afurika y’Uburasirazuba.

Iri tangazo rigira riti“ uwatsinda amatora wese mu Burundi agomba gushyiraho Guverinoma igamije ubumwe kandi ihuriwemo n’abandi bose bitabiriye amatora n’abatarayitabiriye.”

Twabibutsa ko aya matora atavugwaho rumwe n’abarundi bose aho abatavuga rumwe na Leta bavuga ko atarakwiye kubaho kuko Perezida Nkurunziza nta burenganzira yari afite bwo kwiyamamariza manda ya gatatu mu gihe uruhande rw’ubutegetsi rusanga aya matora yari akwiriye kandi ko yubahirije itegeko nshinga.

Abatavuga rumwe n’ubutegetsi banze kwitabira aya matora uretse Agathon Rwasa w’Amizero y’Abarundi.

Imyigaragambyo yo kurwanya bwana Nkurunziza imaze kugwamo abarenga 70 naho impunzi zigera ku 100.000 zimaze guhunga igihugu.

Amatora mu Burundi-Agathon Rwasa Arasaba ko Habaho Reta Ihuriweho na Bose

by www.igihe.info

Agathon Rwasa

Agathon Rwasa, Uwuza imbere mu batavuga rumwe na Reta y’Uburundi ahamagarira umukuru w’igihugu Petero Nkurunziza kubandanya ibiganiro n’abatavuga rumwe nawe,kandi ashireho Reta ihuriwemwo na bose inyuma y’amatora y’umukuru w’igihugu.
Kubwa Rwasa Agathon arongoye Urunani rw’Abigenga Amizero y’Abarundi avuga ko,ibiganiro n’ishingwa ry’intwaro ihuriwemwo na bose,vyokingira igihugu gusubira mu ntambara,ishobora kuva ku bategetsi mu gisirikare bagomvye gutembagaza ubutegetsi hagati mu kwezi kwa 5,bamenyesheje ko bashobora gukoresha ibirwanisho mu gukura ku butegetsi umukuru w’igihugu.
Rwasa Agathon avuga ko ayandi matora yotunganywa inyuma y’umwaka mu ntumbero yo gutorera inyishu ikibazo c’Uburundi.
Mwomenya ko Rwasa Agathon aza mu kibanza ca kabiri mu matora y’umukuru w’igihugu yabaye kw’igenekerezo rya 21 Mukakaro.

RPA AMAKURU

U Burundi buratunga agatoki u Rwanda ko rucumbikiye abasirikare 3 bakomeye barwanya Leta yabwo

by www.igihe.info
Amakuru dukesha RFI, avuga ko ibyo byatangajwe na Alain Aimé Nyamitwe Minisitiri w’ububanyi n’amahanga w’u Burundi, avuga ko hari amakuru bafite yemeza ko hari abasirikare b’iki gihugu baherereye mu Rwanda.

By’umwihariko ibyo akaba yabitangaje nyuma y’igitero cyagabwe ku butaka bw’u Burundi ku wa 10 Nyakanga 2015, kibera mu ntara iri hafi n’umupaka w’u Rwanda n’u Burundi.

Amakuru atangazwa n’uyu muminisitiri ngo ni uko nyuma y’icyo gitero bafite amakuru avuga ko abo bajenerali 3 bari mu Rwanda ari nabo bateguye icyo gitero cyagabwe ku butaka bwabo.

Ati: “Twabimenyesheje icyo gihugu, mu nzira nziza[…]”.

Minisitiri Nyamitwe yakomeje avuga ko igihugu cy’u Burundi kibabajwe n’abasirikare bacyo bari mu Rwanda bakahava bajya gutera ku butaka bwabo.

Hagati aho Leta y’u Rwanda ikaba ntacyo yari yatangaza ku byo u Burundi buvuga ko rwaba rucumbikiye abo basirikare bigometse kuri Leta ya Nkurunziza.

Amatora mu Burundi: CNDD-FDD ku isonga mu matora

by www.igihe.info

Perezida Nkurunziza atora kuri 21-07-2014

Imibare y’agateganyo yatangajwe mu gitondo 22 Nyakanga 2015, nyuma y’amatora y’Umukuru w’Igihugu yabaye kuwa Kabiri, igaragaza ko ishyaka CNDD-FDD rihagarariwe na Perezida Nkurunziza ariryo riza ku isonga rigakurikirwa n’ihuriro ry’amashyaka atavuga rumwe n’ubutegetsi mu Burundi, Amizero y’Abarundi.

Biteganyijwe ko amajwi ntakuka y’ibyavuye mu matora azamenyekana nyuma y’iminsi itatu.

Burundi:Amerika n’Ubwongereza Ntibafitiye Ikizere Amatora ya Perezida Yabaye

by www.igihe.info
Leta zunze ubumwe za Amerika zaburiye Uburundi ko amatora y’umukuru w’igihugu yabaye kuri uyu wa kabiri atizewe kandi ko azatuma leta ibura ikizere. Ministeri y’ububanyi n’amahanga ya Amerika yavuze ko igiye gusubira mu bufatanye icyo gihugu gifitanye n’Uburundi harimo kudaha impushya za visa abo ivuga ko bafite uruhare mu guhembera umutekano muke. Ku ruhande rw’Ubwongereza, ministri ushinzwe Africa, Grant Shapps, yavuze ko leta y’Uburundi yananiwe gushyiraho uburyo bwatuma haba amatora yizewe, yitabiwe na bose mu mahoro. Bwana Shapps yavuze ko kubera iyo mpamvu atemera ayo matora.

BBC

Ngozi-Perezida Nkurunziza Yagiye Gutora ari ku Igare

by www.igihe.info

Mu Mafoto:Amatora mu Burundi

by www.igihe.info

Amatora mu Burundi yatangiye uyu munsi mu gitondo yaranzwe no kutitabirwa n’abatavuga rumwe n’ubutegetsi, imyigaragambyo i Bujumbura kubera umuturage waraye urashwe. Perezida Nkurunziza we yagiye gutora ari ku igare. Willy Nyamitwe avuga ko kuba Opposition ititabiriye amatora atari ikibazo cya CNDD-FDD ko kutitabira amatora kwa opposition ari uburenganzira bwabo. Mugabo Agathon Rwasa we ntiyakuyemo kandidatire ye.
Bamwe mu barundi ntibemera aya matora kuko bavuga ko ari ayo gutuma Perezida Nkurunziza ategeka manda ya gatatu. Bavuga ko aya matora atubahiriza itegeko nshinga n’amasezerano ya Arusha yahagaritse intambara mu Burundi. Ibyo CNDD-FDD ntibikozwa, yo ivuga ko aya matora akwiriye kandi yubahirije itegeko nshinga ry’Uburundi

Amatora mu Burundi-Nkurunziza Yagiye gutora ari ku igare